*स्व. यशवंतराव चव्हाण साहेबांना अभिप्रेत असलेला कराड उत्तर विधानसभा मतदारसंघ घडविणार- मनोज दादा घोरपडे*

 

*कराडच्या प्रीतीसंगमावर स्व. यशवंतराव चव्हाण साहेबांच्या समाधी स्थळी आ. मनोज दादा घोरपडे यांनी केले अभिवादन* 

वेणेगाव 

कराड उत्तर विधानसभा मतदारसंघाचे लोकप्रतिनिधी म्हणून राज्याचे माजी मुख्यमंत्री स्व यशवंतराव चव्हाण साहेबांनी नेतृत्व केले. त्याच मतदारसंघाचे मला नेतृत्व करण्याची संधी जनतेने दिली आहे हे मी माझे भाग्य समजतो.आदरणीय स्वर्गीय यशवंतराव चव्हाण साहेबांचे कराड उत्तर विधानसभा मतदारसंघातील समृद्ध विचाराचे स्वप्न पूर्ण करण्यासाठी मी कटिबद्ध असून गेल्या २५-३०  वर्षात मतदार संघातील झालेला विकास कामांचा बॅकलॉग भरून काढण्यासाठी अत्यंत प्रामाणिक व निष्ठेने काम करणार असल्याचे मत कराड उत्तर विधानसभा मतदारसंघाचे नवनिर्वाचित आमदार मनोज दादा घोरपडे यांनी कराड येथील स्वर्गीय यशवंतराव चव्हाण साहेबांच्या समाधीस्थळी व्यक्त केले. 

आधुनिक महाराष्ट्राचे शिल्पकार स्वर्गीय यशवंतराव चव्हाण साहेबांच्या ४० व्या पुण्यतिथी निमित्त आमदार मनोज घोरपडे यांनी कराडच्या प्रीतीसंगमावर आदरांजली वाहिली.

यावेळी पुढे बोलताना आमदार मनोज घोरपडे म्हणाले, स्वर्गीय यशवंतराव चव्हाण साहेबांचे विचार संपूर्ण महाराष्ट्रभर जोपासले जातात. सत्तेचे विकेंद्रीकरण झाले पाहिजे ही भूमिका चव्हाण साहेबांनी मांडली मात्र गेल्या पंचवीस वर्षात काही मंडळींनी स्वतःच्याच घरात सर्व सत्ता ठेवून यशवंत विचारालाच तिलांजली देण्याचा उद्योग सुरू केला होता. मात्र कराड उत्तर च्या जनतेने सडेतोडपणे याला उत्तर देत खऱ्या अर्थाने यशवंत विचार जोपासण्यासाठीच मला सन्मानाने विधानसभेत पाठवले आहे कराड उत्तरच्या सर्व जनतेचे मी मनापासून ऋणी आहे. कराड उत्तर विधानसभा मतदारसंघातील शेतीच्या पाण्याचा प्रश्न औद्योगीकरण व रोजगार निर्मितीसाठी मी कटिबद्ध राहीन.यावेळी सुरेश तात्या पाटील, चंद्रकांत मदने, अमोल पवार, हरीश पाटील, विनोद डूबल, महेश चव्हाण, अनिल मोहिते, राजू मोहिते उपस्थित होते.

चौकट...

सह्याद्री सहकारी साखर कारखाना निवडणुकीचे रणशिंग फुंकले 

सह्याद्री सहकारी साखर कारखान्यात देखील सभासद ,कामगार यांच्यावर होत असलेल्या अन्याय विरोधात आवाज उठवणार असल्याचे मत आमदार मनोज दादा घोरपडे यांनी कराडच्या प्रीतीसंगमावर व्यक्त करीत सह्याद्री सहकारी साखर कारखान्याच्या निवडणुकीची दिशा स्पष्ट केली आहे.