खोजेवाडीला अखेर वीज पुरवठा सुधारण्याची नवी दिशा

 खोजेवाडीला अखेर वीज पुरवठा सुधारण्याची नवी दिशा

चार वर्षांच्या पाठपुराव्यानंतर सबस्टेशन पूर्ण; ग्रामस्थांच्या हस्ते ट्रान्सफॉर्मर पूजन

वेणेगाव - खोजेवाडी (सातारा) माळरान परिसरातील वीजपुरवठा सुधारण्यासाठी उभारण्यात आलेल्या नव्या सबस्टेशनचे काम अखेर पूर्णत्वास आले आहे. काल (दि. १२) ग्रामस्थांच्या उपस्थितीत आणि महिलांच्या हस्ते नव्या ट्रान्सफॉर्मरचे पारंपरिक पद्धतीने पूजन करण्यात आले. यामुळे खोजेवाडी आणि परिसरातील गावांना दर्जेदार, अखंडित वीजपुरवठा मिळण्याचा मार्ग मोकळा झाला आहे.

           सन 2020 मध्ये पंचायत समिती सदस्य संजय बाबा घोरपडे यांनी या सबस्टेशनची मागणी केली होती. 2023 मध्ये शासनाकडून मंजुरी मिळाल्यानंतर 2024 मध्ये प्रत्यक्ष कामाला सुरुवात झाली. 2025 मध्ये काम अंतिम टप्प्यात येताच ग्रामस्थांचा उत्साह ओसंडून वाहत होता.

          या प्रकल्पासाठी संजूबाबांनी सातत्याने पाठपुरावा केला. आमदार मनोजदादा घोरपडे यांचे मोलाचे सहकार्य, आमदार विक्रांत दादा पाटील यांच्या माध्यमातून माजी भाजप प्रदेशाध्यक्ष ना. चंद्रशेखरजी बावनकुळे, MSCB चे डायरेक्टर विश्वासजी फाटक यांचे मार्गदर्शन यामुळे कामाला गती मिळाली. तांत्रिक बाजूस कार्यकारी अभियंता सुनील माने, अमित बारटक्के, उपकार्यकारी अभियंता प्रशांत वाघ, सिंकदर मुलाणी व अतीत सबस्टेशनचे अभियंता सचिन चव्हाण यांचे योगदान लाभले.

        पूजन प्रसंगी सौ. हिराबाई घोरपडे, सौ. सुनीता साळुंखे व सौ. मनीषा सातपुते यांनी दोन्ही ट्रान्सफॉर्मरना विधीवत पूजन केले. श्री. आनंदराव निळू घोरपडे (आबा) व श्री. आनंदराव एकनाथ घोरपडे (आण्णा) यांनी श्रीफळ वाढविले.

        कार्यक्रमाला ग्रामपंचायत सदस्य भरत घोरपडे, तंटामुक्ती अध्यक्ष यशवंत शितोळे, ह. भ. प. सुशांत महाराज घोरपडे, संजूबाबा युवा मंच कार्यकर्ते, ज्येष्ठ नागरिक तसेच मोठ्या संख्येने महिला-पुरुष ग्रामस्थ उपस्थित होते.

अभिप्राय - "विभागातील शेती व उद्योगासाठी नवे पर्व" – संजय बाबा घोरपडे

"या सबस्टेशनमुळे खोजेवाडी व परिसरातील वीजपुरवठा अधिक स्थिर होईल. शेती, उद्योग, शाळा व घरगुती वापरासाठी वीज खंडित होण्याचे प्रमाण लक्षणीय कमी होईल. शेतकऱ्यांना बारा तास वीज मिळावी यासाठी मी शेवटपर्यंत प्रयत्नशील राहीन," असे संजूबाबा घोरपडे यांनी सांगितले.

खोजेवाडी येथील नवीन विद्युत ट्रान्सफॉर्मरच्या पूजनावेळी पं.स. सदस्य संजय बाबा घोरपडे व ग्रामस्थ